آخماق، الی اگری میللتی شاد اولماز
دوستاقدا قالار همیشه،آزاد اولماز
هر اؤلکه نی تسخیر ائله سین ائششکلیک
ویران اولار او مملکت آباد اولماز

باشیم گیجلمز آرتیق
ایشیم دوزلمز آرتیق
گئدیشیندن بللی دی
گئدیب او گلمز آرتیق
başım gicəlməz artıq
işim düzəlməz artıq
gedişindən bəllidi
gedib o, gəlməz artıq

پاییز،قیش،باهارام من
سنه گوره وارام من
مین یول دونیایا گلسه م
سن سیز یاشامارام من
payız, qış, baharam mən
sənə görə varam mən
Min yol dünyaya gəlsəm
sənsız yaşamaram mən

داغلاری یاشیل و چوللری باغ اولسون
آغ دیر اوزوموز، اونون اوزو آغ اولسون
ویرانه شّهَر کیمین داغیلمیشدیم من
آباد ائله دی عشق منی ساغ اولسون

داغلاری یاشیل و چوللری باغ اولسون
آغ دیر اوزوموز، اونون اوزو آغ اولسون
ویرانه شّهَر کیمین داغیلمیشدیم من
آباد ائله دی عشق منی ساغ اولسون

اونا جانیم دئمه سین
غم، غصه سین یئمه سین
بیریسین ایستیرم کی
آیریسین ایستمه سین
ona canim deməsin
qəm, qüssəsin yeməsin
birisin istirəm ki
Ayrisin istəməsin

آجلیق چوخ ایدی،ظلم و ستم،غم واریدی
آدم چوخ ایدی،گوْزل آدام کم وارایدی
سیزدن خبریم یوخ دی،بیزیم دونیادا
مین یاندیریجی،یامان جهنّم وارایدی

غمدن سو ایچیر گئدیر
انسانی بیچیر گئدیر
عؤمروموز بیر یولچودور
حوزونله کئچیر گئدیر

Qəmdən su içir gedir
İnsanı biçir gedir
Ömrümüz bir yolçudur
Hüzünlə keçir gedir

عشق داغیم، دایاغیم دیر
گول،باغیم-بولاغیم دیر
یانلیش دوشونجه لریم
لاپ بویوک دوستاغیم دیر
Eşq dağim,dayağim dir
Gül,bağim,bulağim dir
Yanlış düşüncələrim
Lap büyük dustağim dir

سنینله بال،شکرم
دردین،نازین چکرم
گوزل،آغ یاناغیندا
آلمالیقلار اکرم